نموت ولا ننتفض
- محلي
- Icon News
- 07:30 pm - ديسمبر 01 , 2021
معادلة شعب عنيد ،حَبّ الجرّة وكره نبع العين
أينما حللت تسمع جملة واحدة " شوناطرة الناس ، ليش مش عم تثور ، ليش مش عم تقول : ليش صار فينا هيك ،وليش صارت ربطة الخبز اليوم بسعر كيلو لحم البقر من سنتين ، وليش صار برميل المازوت اليوم بسعر بيت ، وليش صارت تنكة البنزين أكتر من آجر البيت من سنتين .
هودي عم نقولهم كل يوم وصاروا متل المرحبا كل ما التقى اتنين ع مفرق طريق ومتل العواد بسلامتكم كل ما اجتمع ناس بمأتم حزين .
يعني النق ماشي ، وإذا عملنا احصاء لأكثر الكلامات استعمالا نصل الى نتيجة : صاروا الناس بدون إحساس .
ليش صاروا الناس بدون إحساس ؟
في شي أقوى من الجوع ، وأقوى من الخوف ، وأقوى من التفّكر والتفكير ، وأكبر من كرامة الوطن وكرامة الناس إسمو يا غيرة الدين .
يأ أخي على مين بدك تنتفض ، وعلى مين بدك تثور ،الشيعي بدو يستثني الثّنائي"حزب وحركة" والماروني بدو يستثني الثلاثي "قوات وكتائب وتيار" ، والدرزي بدو يستثني الثلاثي "جنبلاط ووهاب وإرسلان " والسّنّة بدو يستثني الثلاثي " الحريري وميقاتي والمفتي "
وزاد الطين بلّة تجمعات 17 تشرين النزلت عالشارع وطلعت من الشارع على طريقة ،"الهُب طُب "
وإذا نزلت الناس ع الشارع يمكن يصير مدابح لأنو الشيعي بدو يشتم السني والدرزي والماروني ،وكل طرف بدو يشتم ثلاثة أطراف وبالتالي بتكون النزلة ع الشارع مش من شان تحقيق المطالب بل منشان تطبيقة قاعدة واحدع ثلاثة والواحد مش قادر ينتصر ع ثلاثة ،لذلك مش قادرين الناس يحكوا ليش صواتهم مخنوقة تحت زنا نيرهم .
يا صديقي لازم نكون شفافين ونقول :" بدك للحق الناس بتكره كلمة لأ " اي بتكره كلمة "لأ " لأنها بتذكرّها انها مفلوجة واقعة بالأرض وما في مين يخدمها ولا مين يحكّمها .
يا لطيف يا جرجي وحسين وعمر وقاسم قديش نحن مشحرين ، بيوتنا ما عاد فيها لا خبز ولا عنب ولا تين ولا طحين وراضيين لأننا معتقدين الكرامة مرفوعة بإذن الله .
بدك للصراحة هيدا البلد متل خيمة صيفية مرتكزة ع شوية دعائم خشبية ، إذا انكسرت خشبة وقعت الخيمة وطارت مواسم الشتوية ومواسم الصيفية . وما في حدا عم يقول يا عمي هيدا البلد مش خيمة ، هيدا شقفة أرض سارح فيها قطعان من كل الأنواع ،ولكل قطيع راعي غرقان بهموم توسيع الرزق وتكديس المال واكتساب المؤيدين النعسانين ، وما حدا يفكرحتى تصير الارض تعطي قمح ولبن ، لازم الشقفة ترجع لمطرحها والقطعان تصير بشر بتشعر بالوطن والبلاد،والرعيان ناس عندهم كرامة وشرف .
كيف بدها تثور الناس ، كيف بدها تنتفض وعم يلعب بروسهم الوسواس الخنّاس ومزروع ببيوتهم ألف شيطان وعبوابهم ساكن ألف ابليس ، كيف بدك تثور الناس أذا ما حدا قدر يقنعهم أنو الوطن مش طوائف ولا مذاهب ولا قرطة ناس متفاهمين ولا مزراب ذهب للحاكمين ولا مصطبة للسرقة والفساد .
مش مهم تحكي وتعلّي الصوت ، المهم يوصل صوتك للمعدة والقلب والعقل ، مش مهم يشوفك المواطن عم تصرخ ، المهم يصير البني آدم مواطن ويقتنع أنو في بلاد وفي وطن وفي مجموعة مشاكل بالبلاد وبالوطن .
نحن بنحب السهل والهين، وأهون شي يكون الواحد متل الخشب مزروع بعب الطايفة ، وكتير بيرتاح إذا ما بيجي واحد وبخرّبلوا عقلاتو وبيقنعو يكون مزوع متل الشجر بالوطن .
يا أهلي يا هالناس
قبل ما نسأل ليش ال بني آدم بموت وما بثورو ، وقبل ما نقول ليش البني آدم حبّ المياه وكره نبع العين ، وقبل ما نضرب الأخماس بالأسداس ونفرك الأصابع والإيدين، صار لازم نقول وبصوت متل السهم الطاير عم يولول بالشوارع : نحن وين ؟ولوين رايحين ؟
في شي اسمو ترقيع، في شي اسمو تبييض ، ويا لطيف يا صاحبي ع التبييض ، وفي شي اسمو هدم وتعمير ، لأنو ركائز البيت ما عادت تتحمل تجديد وتجميل.
يا هالناس يا اهلي
لازم تطلعوا من بيتوتكم العتيقة المخلخلة قبل ما توقع عليكم ، لازم تطلعوا منها وتسكنوا ببيوت موجودة بس هجرها أهلها ، هيدي البيوت بيوت الوطن والبلاد ال بتمنع خراب بيوتكم العتيقة .
يا هالناس فكروا بحالكم والأجيال الجايي من ولادكم ،وما تفكروا تقطفوا العنب حصرم ، والقمح أخضر ، ما تحاولوا تقطفوا من الورد الجوري ورق ، ما تستعجلوا كتير ، ولا تطفوا النار تحت طنجرة العرانيس قبل ما يصير حب العرنوس متل لبن الغنم .
يا هالناس فكروا مرة منيح وصحيح ،بترتاحوا وبيرتاحوا ولادكم عشرات السنين .
سامي سماحة
نسخ الرابط :
