جان ابي يونس:لا يمكن إعتماد أي خطة إقتصادية للنهوض من دون مشروع حماية إجتماعية يحفظ كرامة المواطن
- محلي
- Icon News
- 07:35 pm - أبريل 16 , 2022
كتب المرشح الدكتور جان ابي يونس على احدى وسائل التواصل الاجتماعي ما يلي:
من أهم أهداف ترشحي، وبدعم القمصان البيض، تقديم مشروع البطاقة الصحية الموحدة و ضمان الشيخوخة. بوضعنا الحالي المذري، لا يمكن إعتماد أي خطة إقتصادية للنهوض من دون مشروع حماية إجتماعية يحفظ كرامة المواطن. نعم لحماية أموال الصناديق الضامنة ولتقديم تغطية صحية شاملة.
انحكى كتير عن ضمان الشيخوخة وما حدا اشتغل بهالملف. كلّو عم يبقى وعود وبيع كلام. شو منقول لأهلنا يلّي عم يكبروا ويتبهدلوا بآخِر ايامن؟ شو منقلّن عن جنى عمرُن يلّي ضاع ويلّي انسرق وهنّي يلّي قضّوا كل حياتن عم يشتغلوا حتى يأمّنوا آخرتن، إجت آخرتن من ورا غياب ضمير المسؤولين يلّي مش حاملين مسؤوليتن.
شو منقلّن عن تعويضن يلّي "تبخّر" من صندوق الضمان وبحال بدّن يقبضوه، بالكاد قيمتو تكفّي كم شهر! وللأسف، منشوف المسؤولين ضامنين أهلن، وضامنين ولادن وولاد ولادن!
بأي حق وبأي عدل وبأي قانون، هنّي بدّن يعيشوا بالُن مرتاح، بالوقت يلّي نحنا ما عم تغمض عيوننا وبالنا مشغول على أهلنا وعلى مستقبل ولادنا!!؟
أي ضمير بيسمح إنّو هنّي يأمّنوا الطبيب لباب بيتُن، بالوقت يلّي كتير من الناس ما عم تقدر توصل على باب المستشفى!؟ أي ضمير بيستوعب حالات الناس يلّي بتوصل على الطوارئ وهنّي على آخر رمق لأنّو صاروا بيتركوا حالن حتى "يهتروا" تيقرّروا يفوتوا عالمستشفى! ليه!!؟ لأنّو الخوف من المستحقات المادية صار أكبر من خوفن على صحّتن الجسدية للأسف
د. جان ابي يونس
لائحة بعبدا تنتفض
نسخ الرابط :
