أخبار
اجا تشرين..
- ثقافة وفن
- Icon News
- 01:51 pm - نوفمبر 15 , 2020
إجا تشرين
مع غيم أسود حزين
ومطر أغزر من غزير
شلّع وراق العنب والتين
فرفط عناقيد
سكّت حساسين
طلّع سكاكين
مرّجح ولاد صغار
فرقعوا بوالين
دوروا طواحين
فرّغوا صناديق
حطوا وجع
بقلب المؤمنين .
إجا تشرين
حامل معو
موعد جديد
وسلّة خبار عن حكايا العيد
عن طفل عم يربى لحالو
بقلب عرزال
عن بدر ما بغيب
عن شوق لتياب الفرح بيوم العيد
إجا تشرين
زرعنا القمح بالأرض
حطينا الخمر بجرار
والمونة بخابية فخار
حملنا صليب الوجع
كبار وصغار
ما تعبنا
ولا حكينا شو صار
شهر تشرين قلنا
بكرا جايي شهر آذار
حضروا الحبق للدار
حضروا الورد للمشوار
حضروا سلال القصب
جايي مواسم العز
زرار زرار .
سامي سماحة
نسخ الرابط :
آخر الاخبار
مقالات أخرى من تصنيف : ثقافة وفن
